Deodar Trees of Jagatsukh - Himachal

Pahaadon ki oonchaaiyon pe, line lagaakar khade hain. Seena taan ke apna aasmaan ko chhoote hue, poori fizaa madhosh hai. Inki maddham-si khushboo se, poori hawa hai taaza aur thandi.

Zameen mein gade hue ye Jagatsukh ke ye devdaar ped, maano kuchh keh rahe hain. Kuchh chaahte hain ye humein samjhaana. Lagte hain jaise bol rahe hain, kyon tumhein hai vaapas jaana?

Apni jadon se jude hue, kitnon ko inhone diya hai saaya. Apni chhaanv se kitne panthiyon ko diya hai aaraam.

In shaakhon ne kitne mausam guzarte dekhe hain, waqt badalte hue dekha hai, aur kitni kahaaniyon ke rah chuke hain ye gawaah.

Apni chuppi mein bhi ye ek granth jaise khulte hain. Aisa laga maano inse hi seekhna hoga jeevan ka saar.